З англійскай мовы на беларускую перакладаюць ролікі сусветна вядомай канферэнцыі TED вучні 23 мінскай гімназіі, прадзіраючыся праз складанасці тэрміналогіі, каб зрабіць беларускую мову яшчэ больш вядомай ў свеце.
Дзявяцікласнікі Піліп Аслюк, Мірон Вітушка і адзнаццацікласніца Амелія Шчарбіна ўзяліся за пераклад на беларускую мову адукацыйных ролікаў знакамітай канферэнцыі TED, а менавіта, ролікі TED ED – кароткія (каля 4 хвілін) адукацыйныя відэаўрокі на самыя разнастайныя тэмы. І ролікі абралі для сябе не самыя простыя. Мірон Вітушка, напрыклад, абраў для сябе тэму "Чаму мы плачам? Тры тыпы слёз" і кажа, што самым складаным было знайсці адпаведнікі ў беларускай мове для няпростых англійскіх тэрмінаў, але хлопец справіўся – ролікі былі адобраныя рэдактарамі TED і зараз беларускую мову можна выбраць сярод іншых моў свету пры праглядзе перакладзеных ролікаў на сайце TED.
Па словах дырэктара 23 гімназіі Ірыны Леанідаўны Пасюкевіч, такая ўключанасць вучняў у выкананне вялікай і адказнай справы – добры педагагічны прыём. Вучні вызваліся зрабіць гэтыя пераклады па ўласнай ініцыятыве, а персанальная зацікаўленасць – найлепшая матывацыя ў вучобе.
Рух TED (папулярны фармат інтэлектуальных канферэнцый, абрэвіятура ад Technology, Entertainment, Design – тэхналогіі, забавы, дызайн), дарэчы, становіцца ўсё больш вядомым і на Беларусі: штогод ладзяцца вялікія канферэнцыі TEDx, на якіх выступаюць вядомыя беларусы і запрошаныя госці.
У гэтым годзе фармат TED дойдзе і да беларускіх старшакласнікаў – у маі 2019 года пройдзе вялікая канферэнцыя TEDxYouth@Minsk, на якой выступяць 10 фіналістаў Рэспубліканскага конкурсу velcom YOUTH, які зараз праходзіць пры падтрымцы Міністэрства адукацыі Беларусі і арганізатараў канферэнцыі TEDxMinsk па ініцыятыве velcom. Вучні 10-х і 11-х класаў зараз рыхтуюць свае праекты ў трох кірунках конкурсу: тэхналогіі, культура і інклюзія, гатовыя прапанаваць свае ідэі, каб змяніць свет да лепшага. Пры вынікі свайго праекта ім патрэбна расказаць у фармаце кароткага відэароліка, а сам конкурс цалкам праходзіць на беларускай мове.
Павел Ліс, дырэктар Галоўнага інфармацыйна-аналітычнага цэнтра Міністэрства адукацыі, кажа: "У праекце velcom YOUTH беларускім старшакласнікам прапанавалі далёка не самае простае – змяніць свет. Каб прыняць удзел у конкурсе патрэбна было прапанаваць ідэі, якая можа змяніць свет да лепшага. Потым школьнікам прапанавалі "пракачаць" свае веды ў сферы публічных выступленняў, навыкаў прэзентацыі, стварэнні і рэалізацыі праектаў. Адукацыйная частка праекта была рэалізаваная з дапамогай сучасных інфармацыйных тэхналогій – навучальны кантэнт і зараз даступны ўсім ахвочым".
У вучняў 10-х і 11-х класаў яшчэ ёсць магчымасць падаць свае заяўкі і даслаць відэаролікі на конкурс да 20 лютага. Падрабязней пра конкурс – на сайце праекта.
разгарнуць » / « згарнуць